ប្រាសាទចេកក្បូរ
កម្ពុជាត្រូវបានគេដឹងថាជាដែនដីដែលសម្បូរទៅដោយប្រាសាទបុរាណរាប់មិនអស់ នៅក្នុងនោះក៏មានប្រាសាទបុរាណមួយដែលមានឈ្មោះថា ប្រាសាទចេកក្បូរ ស្ថិតនៅក្នុងភូមិឈូក ឃុំក្រសាំង ស្រុកចុងកាល់ ខេត្តឧត្ដរមានជ័យ ។
នៅទីនោះមានប្រាង្គបុរាណកសាងឡើង៣ទន្ទឹមគ្នា តែប្រាសាទទាំងនេះបានទទួលរងនូវការខូចខាតអស់ជាច្រើនដោយសារសង្គ្រាម និងជនខិលខូចធ្វើការគាស់កកាយដើម្បីស្វែងរកវត្ថុបុរាណមានតម្លៃ ។ល ។
ឯកសារបានអះអាងថាប្រាសាទចេកក្បូរសាងនៅលើទីទួលដែលមានទំហំ ៣០ម៉ែត្រ គុណនឹង ៣០ម៉ែត្រ ។ ប្រាសាទចេកក្បូរមានប្រាង្គ៣ដែលសាងសង់ទន្ទឹមគ្នា សព្វថ្ងៃនេះនៅសល់តែពីរប៉ុណ្ណោះ ។ ប្រាសាទកណ្តាលមានទំហំ ៥ម៉ែត្រគុណនឹង៥ម៉ែត្រ និងកម្ពស់ ១០ម៉ែត្រ ដែលប្រាសាទកណ្តាលនេះត្រូវបានបុព្វបុរសខ្មែរសាងឡើងតំណាងឲ្យអំណាចកំពូល ។
ប្រាសាទចេកក្បូរត្រូវបានកសាងឡើងអំឡុងឆ្នាំ៦១៦-៦៣៥ ដើមសតវត្សរ៍ទី៧ រជ្ជកាលព្រះបាទឦសាន្តវរ្ម័នទី១ ដោយឥដ្ឋតាន់ ហើយខ្លោងទ្វារធ្វើពីថ្មភក់រចនាបថសម្បូរព្រៃគុហ៍ មាន៥ថ្នាក់ ៕
ដកស្រង់ពីកាសែតរស្មីកម្ពុជា ថ្ងៃទី៣ ខែតុលា ឆ្នាំ២០២១
Comments