ប្រាសាទតាព្រហ្មទន្លេបាទី
ប្រាសាទតាព្រហ្មនៅរមណីយដ្ឋានបាទី
រមណីយដ្ឋានវប្បធម៌ប្រវត្ដិសាស្ដ្រទន្លេបាទី គឺជាកន្លែងដំណើរកំសាន្តដ៏ល្បីល្បាញមួយដែលអ្នកទេសចរជិតឆ្ងាយនិយមនាំគ្នាទៅទស្សនាជាហូរហែ ។ នៅក្នុងរមណីយដ្ឋាននោះ មានប្រាង្គប្រាសាទថ្មពីរដែលកសាងពីសម័យមហានគរ ហើយបានទទួលរងនូវការខូចខាតអស់មួយភាគធំដោយសារសង្គ្រាម និងជនទុច្ចរិតពីអតីតកាល ។ ចំណែកប្រាសាទតាព្រហ្មដែលស្ថិតនៅក្នុងបរិវេណនោះក៏រងនូវការខូចខាតដែរ ប៉ុន្ដែនៅតែជាទីចាប់អារម្មណ៍ពីសំណាក់អ្នកសិក្សាស្រាវជ្រាវ និងអ្នកទេសចរជាបន្តបន្ទាប់ ។
នៅពេលដែលយើងធ្វើដំណើរចេញពីទីក្រុងភ្នំពេញតាមបណ្ដោយផ្លូវជាតិលេខ២ ក្នុងចម្ងាយប្រមាណ ៣៥គីឡូម៉ែត្រ រួចបត់ចូលទៅខាងស្ដាំដៃចូលតាមផ្លូវលំប្រមាណ ២គីឡូម៉ែត្រ នឹងដល់រមណីយដ្ឋានទន្លេបាទីដែលមានទឹកល្ហល្ហេវខួបប្រាំងវស្សា បង្កលក្ខណៈងាយស្រួលដល់អ្នកទេសចរ ចំណែកនៅទួលនោះមានប្រាសាទបុរាណពីរ គឺប្រាសាទតាព្រហ្ម និងប្រាសាទយាយពៅ ។ ប្រាសាទបុរាណនេះស្ថិតនៅភូមិទក្សិណ ឃុំក្រាំងធ្នុង ស្រុកបាទី ខេត្ដតាកែវ ដែលកសាងឡើងក្នុងរជ្ជកាលព្រះបាទជ័យវរ្ម័នទី៧ នាសម័យមហានគរដើម្បីឧទ្ទិសថ្វាយចំពោះព្រហ្មញ្ញសាសនា និងព្រះពុទ្ធសាសនា តាមរចនាប័ទ្មបាយ័ន ធ្វើពីថ្មបាយក្រៀម មានបណ្ដោយ៤២ម៉ែត្រ ទទឹង៣៦ម៉ែត្រ និងកម្ពស់១១ម៉ែត្រ ។
នៅជុំវិញប្រាសាទមានថែវ គោបុរៈ និងគូទឹកព័ទ្ធជុំវិញ ប៉ុន្ដែត្រូវខូចខាតអស់ហើយ ។ នៅក្នុងបន្ទប់នៃប្រាសាទ គេខណ្ឌចែកជា៥ផ្នែក ដោយមានតម្កល់ព្រះពុទ្ធរូបសម្រាប់គោរពបូជាទៀតផង ហើយផ្នែកខាងក្រោមមានក្បូរក្បាច់ចម្លាក់ផ្សេងៗ និងរូបគ្រុឌដែលទាក់ទងនឹងរឿងព្រេងនិទានព្រហ្មញ្ញសាសនា និងព្រះពុទ្ធសាសនា ។
នៅតំបន់នោះត្រូវបានក្រុមហ៊ុនរៀបចំជាកន្លែងលំហែកាយតាមមាត់ទន្លេ មានតូបធ្វើពីឈើប្រក់ស័ង្កសី និងធ្វើពីឈើប្រក់ស្លឹកសម្រាប់អ្នកទេសចរណ៍អង្គុយលំហែកាយ និងមានកន្លែងងូតទឹកកម្សាន្ត ។ ជាពិសេសក្រុមហ៊ុនបានរៀបចំសម្រួលបរិស្ថានអនាម័យកន្លែងផ្ញើកង់ ម៉ូតូ និងមានលក់ដូរម្ហូបអាហារសម្រាប់ឲ្យភ្ញៀវទទួលទានយ៉ាងសម្បូរបែបទៀតផង ។
ទាក់ទិននឹងប្រាសាទបុរាណនេះ បើតាមប្រជុំរឿងព្រេងខ្មែរភាគទី៥ បាននិទានថា ព្រះបាទកេតុមាលា សោយរាជ្យនៅមហានគរ ជាស្ដេចមានបុណ្យអស្ចារ្យណាស់ ។ វេលាថ្ងៃមួយស្ដេចទ្រង់អផ្សុក គង់ក្នុងប្រាសាទពុំបាន ទ្រង់ក៏យាងកម្សាន្តព្រះរាជហឫទ័យជាមួយនិងពលរេហ៍ ដោយផ្លូវនាវាតាមឆ្នេរសមុទ្រត្រើយខាងត្បូង ។ លុះយាងទៅដល់ទន្លេបាទី ទ្រង់ចតព្រះទីនាំងនាវានៅត្រើយនោះ ហើយអ្នកស្រុកពេលឮដំណឹងក៏នាំគ្នាថ្វាយបង្គំ និងនាំនូវសួយសារអាករមកថ្វាយព្រះអង្គគ្រប់ៗគ្នា ។
កាលនោះមានស្ដ្រីម្នាក់មានទ្រព្យសម្បត្ដិស្ដុកស្ដម្ភ និងមានកូនស្រីឈ្មោះ ពៅ មានរូបសម្បត្ដិស្រស់ស្អាតលើសស្រីផងទាំងពួង ហើយគាត់នាំកូនរបស់គាត់ទៅគាល់ស្ដេចជារៀងរាល់ថ្ងៃ ។ ព្រះកេតុមាលាពេលទតឃើញនាងពៅមានរូបសម្បត្ដិស្រស់ស្អាត ក៏ចេះតែធ្វើការចំអែចំអន់ និងមានព្រះទ័យប្រតិព័ទ្ធទៀតផង ។ ចំណែកឯម្ដាយនាងពៅឃើញដូច្នេះ ក៏លើកនាងពៅថ្វាយព្រះមហាក្សត្រ ហើយព្រះអង្គក៏តែងតាំងជាអគ្គមហេសី ។ ព្រះអង្គបានគង់នៅទីនោះរយៈពេល៣ខែ ហើយនាងពៅក៏មានគភ៌ ពេលនោះព្រះមហាក្សត្រក៏បានយាងត្រឡប់ទៅព្រះមហានគរវិញ ដោយព្រះអង្គបានទុកព្រះទម្រង់ឲ្យនាងពៅទុកជាភស្ដុតាង ។
ព្រះអង្គទ្រង់ផ្ដាំផ្ញើថា ពេលបុត្រធំដឹងក្ដី បើមិនមានការងារអ្វីធ្វើ ឲ្យទៅរកចុះ ដោយគ្រាន់តែបង្ហាញព្រះទម្រង់ ចំណែកនាងពៅមានការអាលោះអាល័យព្រះស្វាមី ដោយយំសោកសង្រេងយ៉ាងខ្លាំង ព្រោះស្វាមីមិនឲ្យទៅតាម ។ ក្រោយមក គភ៌នាងពៅគ្រប់ខែក៏ប្រសូត្រព្រះរាជបុត្រាមួយអង្គ មានរូបល្អដូចព្រះបិតា ដោយម្ដាយឲ្យនាមថា អង្គព្រហ្មកុមារ ដោយសារព្រះរាជកុមារប្រសូតនៅព្រំទន្លេ ។ អង្គព្រហ្មធំឡើងក៏សួរនាំមាតារកបិតារបស់ខ្លួន ពេលនោះនាងពៅក៏បានប្រាប់កូនថា បិតារបស់កូនគង់នៅឯមហានគរឯណោះ ។
នាងពៅគ្រាន់តែនិយាយចប់ក៏ដោះព្រះទម្រង់ឲ្យកូនពាក់នៅព្រះហស្ដស្ដាំ ហើយអង្គព្រហ្មក៏លាមាតាឡើងជិះសេះរហូតដល់ខ្លោងទ្វារប្រាសាទមហានគរ បានជួបអ្នកចាំទ្វារសួររកព្រះបិតា ។ បន្ទាប់ពីបានស្ដាប់រួចហើយ ឆ្មាំក៏ចាត់ឲ្យកូនចៅទៅក្រាបបង្គំទូលស្ដេច ទ្រង់ជ្រាបក៏ត្រាស់បង្គាប់ឲ្យចូល ហើយអង្គព្រហ្មចូលថ្វាយបង្គំព្រះវរបិតា រួចដោះព្រះទម្រង់ថ្វាយ ។ ព្រះកេតុមាលាទតឃើញអង្គព្រហ្ម និងព្រះទម្រង់ក៏ស្គាល់ច្បាស់ជារាជបុត្រ និងសួរសុខទុក្ខក្រុមគ្រួសារ រួចមកក៏ចាត់ព្រះរាជកុមារឲ្យធ្វើជាចៅហ្វាយស្រុកនៅត្រើយខាងកើតទន្លេ ដោយសារនៅទីនោះមិនទាន់មាននាម៉ឺននៅត្រួតត្រា ។
លុះពេលអង្គព្រហ្មបានធ្វើស្ដេចក្រាញ់នៅស្រុកនោះ ហើយទ្រង់បានចាត់ចែងឲ្យកសាងប្រាសាទ២ មួយជូនមាតា និងមួយទៀតគង់នៅផ្ទាល់ខ្លួន ដោយបានធ្វើបន្ទាយព័ទ្ធជុំវិញទៀតផង ។ ចំណែកនៅក្បែរនោះជាទីក្រសាល និងកន្លែងបំពេញការងាររបស់រាជការគ្រប់ជាន់ថ្នាក់ដែលត្រូវមកជួបប្រជុំគ្នា ។
រមណីយដ្ឋានវប្បធម៌ប្រវត្ដិសាស្ដ្រទន្លេបាទី មានសំណង់ប្រាសាទដែលបុព្វបុរសយើងបានបន្សល់ទុក នៅខាងលិចប្រាសាទមានទឹកខួបប្រាំងខួបវស្សា ដែលពួកអាជីវករសង់តូបសម្រាប់អង្គុយកម្សាន្ត និងកន្លែងហែលទឹកលេង ។ ដោយសារតែទីនោះមានបរិស្ថានល្អ មានអនាម័យ និងមានការរៀបចំសណ្ដាប់ធ្នាប់សន្ដិសុខគួរជាទីពេញចិត្ដ ។ សព្វថ្ងៃនេះ នៅថ្ងៃឈប់សម្រាក និងបុណ្យទានម្ដងៗ មានប្រជាពលរដ្ឋ និងអ្នកទេសចរចម្រុះជាតិសាសន៍នាំគ្នាទៅទស្សនាយ៉ាងច្រើនកុះករ ៕
Comments