ប្រាសាទមានជ័យ

ទិដ្ឋភាពប្រាសាទមានជ័យខាងកើត

ប្រាសាទមានជ័យមានទីតាំងនៅភូមិចាន់ផ្អែម ឃុំខ្វាវ ស្រុកជីក្រែង ខេត្ដសៀមរាប បើចេញដំណើរពីប្រាសាទបឹងមាលាទៅទិសខាងកើត ប្រមាណ ១៥គីឡូម៉ែត្រ តាមផ្លូវលំបុរាណមួយ ។

ប្រាសាទនេះចែកជា ២ផ្នែកគឺ ប្រាសាទមានជ័យខាងកើត និងប្រាសាទមានជ័យខាងលិច ដោយឃ្លាតពីគ្នាប្រហែល ៥០០ម៉ែត្រ ។ ប្រាសាទទាំងពីរនេះសង់នៅលើដីរាបស្មើ ក្នុងនោះប្រាសាទខាងលិចមានទំហំ ៥០ម៉ែត្របួនជ្រុង កំពែងព័ទ្ធជុំវិញ ធ្វើពីថ្មបាយក្រៀមខាងក្រោមថ្មភក់ខាងលើ ប្រកបដោយក្បូរក្បាច់រចនាយ៉ាងល្អវិចិត្រ ។ ប្រាសាទនេះមានប្រាង្គចំនួន៥សង់ពីថ្មភក់ សុទ្ធតែប្រកបដោយក្បាច់ចម្លាក់រស់រវើក នៅលើផ្ដែរ និងសសរពេជ្រ ប៉ុន្ដែមានស្នាមដាប់យករូបចម្លាក់ដោយជនទុច្ចរិតបំផ្លាញបេតិកភណ្ឌជាតិ ។ នៅតាមប្រាង្គនីមួយៗមានរណ្ដៅបួនជ្រុងជម្រៅ ៣ទៅ៤ម៉ែត្រ ដូចរណ្ដៅសីមា ប៉ុន្តែអ្នកស្រុកបានហៅរណ្ដៅនេះថា «អណ្ដូងតាព្រេង» ទៅវិញ ។ ចំណែកប្រាសាទមានជ័យខាងកើតមានទំហំ ២០ម៉ែត្រ គុណ ៧ម៉ែត្រ មានប្រាង្គ១ កំពូល១ ដែលតភ្ជាប់ពីកំពូលប្រាង្គដោយរោងទងដែលគេជឿថាជាគុក ឬទីឃុំឃាំង សម្រាប់ដាក់អ្នកទោសដែលអ្នកស្រុកហៅថា ប្រាសាទគុក ។

លោកភត់ ផល អាយុ ៤៨ឆ្នាំ ប្រជាពលរដ្ឋនៅភូមិចាន់ផ្អែម ឃុំខ្វាវ ស្រុកជីក្រែង ខេត្ដសៀមរាប បានឲ្យដឹងថា តាមលោកឮចាស់ៗតំណាលតៗមកថា ប្រាសាទមានជ័យទាំងពីរនេះគឺជាអតីតបន្ទាយទ័ពដែលស្ដេចជំនាន់មុន មកគង់នៅហាត់រៀនក្បួនយុទ្ធសាស្ដ្រមន្តអាគម ។ ក្រោយៗមកឲ្យតែស្រុកទេសមានសង្គ្រាម មេទ័ពខ្មែរតែងភៀសខ្លួនមកកងទ័ពនៅទីនេះត្រៀមវាយបកនៅបច្ចាមិត្តវិញ ដោយប្រាសាទខាងលិចសម្រាប់ស្នាក់នៅមានទីធ្លាហ្វឹកហ្វឺនកងទ័ព ឯប្រាសាទខាងកើតជាគុកសម្រាប់ដាក់អ្នកទោស ។ សូម្បីតែជំនាន់ឥស្សរៈប្រឆាំងបារាំង រហូតដល់ជំនាន់ខ្មែរក្រហម ក៏ពួកនេះបានយកប្រាសាទមានជ័យធ្វើជាជំរំសម្ងាត់ បង្កឧទ្ទាមកម្មប្រឆាំងរដ្ឋាភិបាលដែរ ។ ប្រាសាទទាំងពីរនេះប្រជាពលរដ្ឋខ្មែរជឿថាមានបារមីស័ក្តិសិទ្ធិណាស់តែងមកបន់ស្រន់សុំសេចក្ដីសុខចម្រើនគ្រប់គ្នា ។

លោកផល បន្តទៀតថា លោកក៏មិនបានដឹងថាប្រាសាទនេះកសាងក្នុងរជ្ជកាលស្ដេចអង្គណាដែរគឺឃើញតែប៉ុណ្ណឹង ព្រោះគ្មានឯកសារពិតប្រាកដ ប៉ុន្ដែតាមស្មានទំនងជាកសាងនៅក្នុងរចនាបថអង្គរវត្ដ ។ កន្លងមកដោយហេតុតែប្រាសាទដ៏អភ័ព្វនេះតាំងនៅកណ្ដាលព្រៃស្ងាត់ជាហេតុឲ្យជនទុច្ចរិតចូលមកជីកគាស់យកវត្ថុបុរាណដាប់យករូបចម្លាក់ទៅលក់ធ្វើឲ្យតួប្រាសាទបាត់បង់សោភ័ណភាពស្ទើរអស់និងត្រូវព្រៃព្រឹក្សាលតាវល្លិរុំឆ្វាក់ពីលើគួរឲ្យស្រណោះ ៕

ប្រាសាទមានជ័យ