ថៃរៀបចំសេចក្តីព្រាងច្បាប់ ETF គ្រីបតូ

អាជ្ញាធរផ្សារមូលបត្រថៃបានចាប់ផ្តើមប្រមូលមតិសាធារណៈលើសេចក្តីព្រាងច្បាប់ថ្មី សម្រាប់ការបង្កើតមូលនិធិ ETF ទ្រព្យឌីជីថល ផ្អែកលើប៊ីតខូអ៊ិន និងអ៉ីសឺរៀម។ វិធានការនេះធ្វើឡើងដើម្បីទាក់ទាញវិនិយោគិនស្ថាប័ន និងជំរុញឱ្យប្រទេសថៃក្លាយជាមជ្ឈមណ្ឌលទ្រព្យឌីជីថលនៅក្នុងតំបន់។

គណៈកម្មការមូលបត្រថៃបានបោះជំហានយ៉ាងសំខាន់ ដោយរៀបចំសេចក្តីព្រាងច្បាប់សម្រាប់មូលនិធិ ETF ទ្រព្យឌីជីថល ដោយផ្តោតលើតែប៊ីតខូអ៊ិន និងអ៉ីសឺរៀមប៉ុណ្ណោះ។ តាមគម្រោង មូលនិធិនេះនឹងជួញដូរលើផ្សារភាគហ៊ុនថៃ ដោយតម្រូវឱ្យរក្សាការវិនិយោគយ៉ាងតិច ៨០ភាគរយលើទ្រព្យដើមផ្ទាល់។ លើសពីនេះ អាជ្ញាធរបានកំណត់ច្បាប់សម្រាប់ក្រុមហ៊ុនរក្សាទុកទ្រព្យឌីជីថល ដោយតម្រូវឱ្យប្រើប្រាស់សេវាកម្មក្នុងស្រុកជាចម្បង ដើម្បីបង្កើនសុវត្ថិភាព និងការពារវិនិយោគិន។ ការកែសម្រួលលិខិតបទដ្ឋានផ្លូវច្បាប់នេះ បង្ហាញពីបំណងប្រាថ្នារបស់ប្រទេសថៃ ក្នុងការទាក់ទាញស្ថាប័នវិនិយោគធំៗ ព្រមទាំងប្រែក្លាយខ្លួនទៅជាមជ្ឈមណ្ឌលទ្រព្យឌីជីថលដ៏សំខាន់មួយនៅក្នុងតំបន់អាស៊ីអាគ្នេយ៍។