ប៉ាគីស្ថានបើកប្រព័ន្ធសុំអាជ្ញាបណ្ណគ្រីបតូ

អាជ្ញាធរទ្រព្យសកម្មនិម្មិតប៉ាគីស្ថានបានបើកវិបផតថលទទួលពាក្យសុំអាជ្ញាបណ្ណសម្រាប់ក្រុមហ៊ុនគ្រីបតូ។ ក្រុមហ៊ុនដែលកំពុងប្រតិបត្តិការត្រូវដាក់ពាក្យសុំលិខិតអនុញ្ញាតមុនថ្ងៃទី៥ ខែកញ្ញា ជាកំហិត ដើម្បីចៀសវាងការប្រឈមមុខនឹងបទល្មើសផ្លូវច្បាប់ និងត្រូវបិទទ្វារ។

អាជ្ញាធរគ្រប់គ្រងទ្រព្យសកម្មនិម្មិតប៉ាគីស្ថានបានប្រកាសដាក់ឱ្យប្រើប្រាស់វិបផតថលស្នើសុំអាជ្ញាបណ្ណជាផ្លូវការសម្រាប់ផ្សារជួញដូរ និងអ្នកផ្តល់សេវាទ្រព្យសកម្មនិម្មិត។ ក្រុមហ៊ុនដែលធ្លាប់ផ្តល់សេវាកម្មមុនថ្ងៃទី៥ ខែមីនា តម្រូវឱ្យដាក់ពាក្យសុំលិខិតគ្មានការជំទាស់ឱ្យបានមុនថ្ងៃទី៥ ខែកញ្ញា ប្រសិនបើបន្តប្រតិបត្តិការដោយគ្មានពាក្យសុំ នោះនឹងត្រូវចាត់ទុកជាបទល្មើសច្បាប់។ ក្របខណ្ឌថ្មីនេះគ្របដណ្តប់លើការរក្សាទុកទ្រព្យ ការផ្តល់ប្រាក់កម្ចី ការគ្រប់គ្រងមូលនិធិ ការបោះផ្សាយតូខឹន និងការជីកយកកាក់ជាដើម។ លើសពីនេះ ធនាគារជាតិប៉ាគីស្ថានក៏បានអនុញ្ញាតឱ្យធនាគារពាណិជ្ជបើកគណនីជូនក្រុមហ៊ុនដែលមានអាជ្ញាបណ្ណត្រឹមត្រូវ ខណៈក្រុមហ៊ុនដែលមានអាជ្ញាបណ្ណទាំងអស់ត្រូវបំបែកទ្រព្យសម្បត្តិអតិថិជនឱ្យដាច់ដោយឡែកពីទ្រព្យក្រុមហ៊ុន។