🌿ជីវិតខ្ញុំ មិនដែលឡើងខ្ពស់កប់ពពកទេ

🌿ជីវិតខ្ញុំ មិនដែលឡើងខ្ពស់កប់ពពកទេ ។ តែខ្ញុំធ្លាប់ធ្លាក់ដល់បាត ។ ហើយជាញឹកញាប់ណាស់ ដែលពាក្យថាជីវិតនេះ តែងតែរុញខ្ញុំ ឱ្យចូលខុសផ្លូវ ឬ ផ្លូវទាល់។
ខ្ញុំបង់ខាតពេលវេលាច្រើនសន្ធឹក ដើម្បីដើរបកត្រលប់ ឬ ចាប់ផ្ដើមជាថ្មី ។ ហើយរៀនពីវាម្ដងជាពីរដង។
🌿ស្នេហាបរាជ័យហើយបរាជ័យទៀត ។ តែខ្ញុំនៅតែមិនបោះបង់ ហើយតែងប្រាប់ខ្លួនឯងជានិច្ចថា ខ្ញុំនេះមានសិទ្ធិសោយសុខក្នុងការរស់នៅ មានសិទ្ធិទទួលបានសុភមង្គល ។ ព្រោះខ្ញុំជាមនុស្សល្អ។ ខ្ញុំស័ក្កសមនឹងទទួលបានវា នៅវេលាណាមួយ។ ពាក្យថា មនុស្សល្អ សម្រាប់ខ្ញុំគឺ ខ្ញុំមិនដែលទៅធ្វើឱ្យនរណាម្នាក់ឈឺចាប់ដោយសារខ្ញុំ ខ្ញុំមិនដែលបំពានការរស់នៅរបស់អ្នកដទៃ ខ្ញុំមើលថែលោកឪពុកអ្នកម្ដាយខ្ញុំ មិនឱ្យទើសទាស់ ប៉ុណ្ណឹងខ្ញុំល្អ សម្រាប់ខ្ញុំខ្លួនឯងហើយ។
🌿ខ្ញុំមិនដែលធ្វើអ្វីមួយបានល្អទេ! តែបើមានអ្នកណាម្នាក់ធ្វើបានល្អជាងខ្ញុំ សរសេរបានល្អជាងខ្ញុំ ខ្ញុំតែងស៊ែអត្ថបទនោះ ព្យាយាមរុញច្រានរឿងទាំងនោះ ទៅឱ្យបានឆ្ងាយជាងនេះ ទៅឱ្យដល់ដៃមិត្តដែលចូលចិត្តអានផ្សេងទៀត។ បើយើងធ្វើមិនបាន តែគេធ្វើបាន គួរចំណាយពេលចែករំលែក និង សាទរ។ មិនមែនគៀសគេចេញពីផ្លូវ ដោយអាកាច្រណែនឈ្នានីសនោះទេ។
🌿មិនថា មនុស្ស របស់ ឬ សត្វ! បើខ្ញុំច្បាស់ថា ខ្ញុំថែមិនបានល្អ បើអ្នកផ្សេងណាម្នាក់ អាចមើលថែបានល្អជាងខ្ញុំ។ ខ្ញុំនឹងដកខ្លួន ប្រគល់សិទ្ធឱ្យគេ ដោយមិនរារែក។
🌿ខ្ញុំរស់ក្នុងភាពមិនសមបំណង ស្ទើរពេញមួយជីវិត។ ហេតុនេះបញ្ហាលើកនេះមិនជាអ្វីទេ មិនមែនជាលើកទីមួយឡើយ។ ខ្ញុំអាចស៊ូបន្ដបាន ។ ពេលនេះអាចមិនទាន់OK តែក៏មិនរត់ទៅបំផ្លាញខ្លួនឯងដែរ។ទម្រាំមានថ្ងៃនេះ ខ្ញុំឆ្លងកាត់រឿងរ៉ាវមកច្រើនណាស់ ។
សង្ឃឹមថា ព្រះនឹងរំភើបចិត្ត ចំពោះការតស៊ូយ៉ាងស្វិតស្វាញ របស់ខ្ញុំ ។ ការលំបាកទាំងឡាយ ជាសក្ខីភាពមួយ ដែលបញ្ជាក់យ៉ាងច្បាស់លាស់ថា ខ្ញុំរឹងមាំគ្រប់គ្រាន់នឹងបន្ដជីវិតទៅមុទៀតបាន។
ហើយខ្ញុំនឹងទទួលបាននូវសុភមង្គល ទាំងសុខភាពល្អ មិនថាកាយ ឬ ចិត្ត។
__________________________________