មហាសេដ្ឋីរបស់ពិភពលោក បានយល់ព្រមលើការដេញថ្លៃទិញ Twitter ក្នុងតម្លៃ ៤៤ពាន់លានដុល្លារ ត្រូវនឹងជាង ៣៤ពាន់លានផោន កាលពីខែមុន។ ប៉ុន្តែលោកបាននិយាយថា កិច្ចព្រមព្រៀងនេះមិនទាន់បានបញ្ចប់ទេ ហើយវាអាចប្រើរយៈពេលពីរទៅបីខែខាងមុខ។
លោក ម៉ាស បានប្រាប់កាសែត Financial Times ថាការសម្រេចចិត្តរបស់ Twitter ក្នុងការហាមឃាត់អតីតប្រធានាធិបតីអាម៉េរិកគឺ ខុសសីលធម៌ និងធ្វើឡើងដោយភាពល្ងង់ខ្លៅ។
គួរបញ្ជាក់ថា នៅខែមករាឆ្នាំ ២០២១ Twitter បាននិយាយថាគណនីរបស់លោក ត្រាំ ត្រូវបានផ្អាកជាអចិន្ត្រៃយ៍ ដោយសារតែហានិភ័យនៃការញុះញង់ឱ្យមានអំពើហិង្សាបន្ថែមទៀត ក្រោយពីលោកបានហៅអ្នកវាយប្រហារវិមាន កាពីតូល របស់សហរដ្ឋអាម៉េរិកថាជា «អ្នកស្នេហាជាតិ»។
ប៉ុន្តែម្ចាស់ក្រុមហ៊ុន តេស្លា បាននិយាយថា៖ «ខ្ញុំនឹងលុបចោលការហាមឃាត់ជាអចិន្ត្រៃយ៍ ប៉ុន្តែខ្ញុំមិនទាន់ជាម្ចាស់ Twitter នៅឡើយទេ ដូច្នេះនេះមិនមែនជារឿងដែលប្រាកដថានឹងកើតឡើងនោះទេ»។
លោកបានលើកឡើងថា ការហាមប្រាមនេះ មិនបានធ្វើឱ្យលោក ត្រាំ ស្ងាត់ស្ងៀមនោះទេ ប៉ុន្តែវាធ្វើឱ្យលោកផ្លាស់ប្ដូរទៅកាន់គេហទំព័រ Truth Social ផ្ទាល់របស់លោក ដែលបានពង្រីកមតិរបស់លោកកាន់តែខ្លាំង។
យ៉ាងណាមិញ លោក ម៉ាស បានចង្អុលបង្ហាញថាលោក ត្រាំ ធ្លាប់បានអះអាងថានឹងមិនត្រលប់មករក Twitter វិញទេ បើទោះបីជាគណនីរបស់លោកត្រូវបានស្តារឡើងវិញក៏ដោយ៕
63.133 SRY