តំបន់បេតិកភណ្ឌធម្មជាតិពីរនៅកំពតសង្ស័យថាជាជម្រកសត្វនិងសម្បូរដោយជីវៈចម្រុះ

ភ្នំព្រះគុហារហ្លួង និងភ្នំទទុង-ភ្នំតូច ដែលស្ថិតក្នុងខេត្តកំពត ត្រូវបានក្រុមអ្នកសិក្សាស្រាវជ្រាវរកឃើញ ថនិកសត្វចំនួន១២ប្រភេទ ល្មូនចំនួន១៨ប្រភេទ និងថលជលិក ស្ថិតក្នុងក្រុមកង្កែប ចំនួន៨ប្រភេទ។ ជាមួយគ្នានោះ មាន៣ប្រភេទស្ថិតក្នុងក្រុមប្រភេទជិតផុតពូជបំផុត CR , ២ប្រភេទស្ថិតក្នុងក្រុមជិតផុតពូជ EN និង២ប្រភេទទៀតស្ថិតក្នុងក្រុមប្រភេទងាយទទួលរងគ្រោះ VU។ 


 សូមបញ្ជាក់ថា ដោយមើលឃើញពីគុណតម្លៃនៃជីវៈចម្រុះ សេវាកម្មប្រព័ន្ធអេកូឡូស៊ី និងសម្បត្តិវប្បធម៌ធម្មជាតិ ជាពិសេសភ្នំថ្មកំបោរ និងល្អាងភ្នំជាច្រើន ទើបនៅថ្ងៃទី២២ ខែមករា ឆ្នាំ២០២១ រាជរដ្ឋាភិបាលកម្ពុជាបានសម្រេចចេញអនុក្រឹត្យចំនួន២។ អនុក្រឹត្យលេខ ១២. អនក្រ.បក ស្តីពីការបង្កើតតំបន់បេតិកភណ្ឌធម្មជាតិ ភ្នំព្រះគុហារហ្លួង មានទំហំ២៥ហិកតា ស្ថិតក្នុងឃុំទូកមាសខាងលិច ស្រុកបន្ទាយមាស ខេត្តកំពត។ អនុក្រឹត្យលេខ ១៣. អនក្រ.បក ស្តីពីការបង្កើតតំបន់បេតិកភណ្ឌធម្មជាតិ ភ្នំទទុង-ភ្នំតូច មានទំហំ៨៣,៤៤ហិកតា ស្ថិតក្នុងស្រុកដងទង់ និងស្រុកបន្ទាយមាស ខេត្តកំពត៕