រដ្ឋមន្ត្រីសុខាភិបាលអាហ្វ្រិកខាងត្បូងនិយាយថា ពិភពលោកមិនចាំបាច់ត្រូវនាំគ្នាបារម្ភអំពីមេរោគបំប្លែងខ្លួនអូមីក្រុង

រដ្ឋមន្ត្រីសុខាភិបាលអាហ្រ្វិកខាងត្បូងនិយាយថា "ពិតជាមិនចាំបាច់ភ័យស្លន់ស្លោទេ" ជុំវិញមេរោគបំប្លែងខ្លួនថ្មីអូមេក្រុង បើទោះបីជាមានករណីឆ្លងកើនឡើងក៏ដោយ។លោក ចូល ផាអាឡា បានបន្ថែមថា "យើងបាននៅទីនេះពីមុនមក" ដោយសំដៅលើមេរោគបំប្លែងខ្លួនបេតា ដែលបានរកឃើញនៅអាហ្វ្រិកខាងត្បូងកាលពីខែធ្នូឆ្នាំមុន។អាហ្រ្វិកខាងត្បូងក៏បានថ្កោលទោសការហាមឃាត់ការធ្វើដំណើរដែលបានដាក់លើប្រទេសនេះផងដែរ ដោយនិយាយថា បម្រាមគួរតែដកចេញភ្លាមៗ។មេរោគអូមេក្រុងត្រូវបានចាត់ថ្នាក់ជា "មេរោគបំប្លែងខ្លួនដ៏គួរឱ្យព្រួយបារម្ភ" ។ ភស្តុតាងដំបូងបង្ហាញថា វាមានហានិភ័យខ្ពស់នៃការឆ្លងឡើងវិញ។មេរោគបំប្លែងខ្លួនដែលបានបំប្លែងខ្លួនយ៉ាងខ្លាំងនេះត្រូវបានរកឃើញនៅអាហ្វ្រិកខាងត្បូងកាលពីដើមខែនេះ ហើយបន្ទាប់មកបានរាយការណ៍ទៅអង្គការសុខភាពពិភពលោក (WHO) កាលពីថ្ងៃពុធសប្តាហ៍មុន។

មេរោគបំប្លែងខ្លួននេះគឺទទួលខុសត្រូវចំពោះការឆ្លងភាគច្រើនដែលត្រូវបានរកឃើញនៅក្នុងខេត្តហ្គោថេង ដែលមានប្រជាជនច្រើនបំផុតនៅអាហ្វ្រិកខាងត្បូងក្នុងរយៈពេលពីរសប្តាហ៍ចុងក្រោយនេះ។ចំនួនករណីឆ្លង "ហាក់ដូចជាកំពុងកើនឡើងស្ទើរតែគ្រប់ខេត្តទាំងអស់" នៅក្នុងប្រទេស នេះបើយោងតាមអង្គការសុខភាពពិភពលោក។អាហ្រ្វិកខាងត្បូងបានរាយការណ៍ពីការឆ្លងថ្មីចំនួន ២.៨០០ ករណី កាលពីថ្ងៃអាទិត្យដែលជាការកើនឡើងពីជាមធ្យមប្រចាំថ្ងៃ ៥០០ ករណីក្នុងសប្តាហ៍មុន។ទីប្រឹក្សារដ្ឋាភិបាលនិងជាអ្នកជំនាញខាងជំងឺរាតត្បាត លោក សាលីម អាប់ឌុល ការីម បាននិយាយថា លោករំពឹងថាចំនួនករណីឆ្លងនឹងកើនឡើងដល់ជាង ១ ម៉ឺនករណីក្នុងមួយថ្ងៃនៅចុងសប្តាហ៍នេះ ហើយសម្រាប់មន្ទីរពេទ្យនឹងទទួលរងសម្ពាធក្នុងរយៈពេលពីរទៅបីសប្តាហ៍ខាងមុខ។លោកវេជ្ជបណ្ឌិតផាអាឡាបាននិយាយថា គាត់ចង់ "បញ្ជាក់ម្តងទៀតថាមិនចាំបាច់ភ័យស្លន់ស្លោទេ" ពីព្រោះ "វាគ្មានអ្វីថ្មីសម្រាប់ទឹកដីរបស់យើងទេ"។លោកបានបន្ថែមនៅក្នុងសន្និសីទសារព័ត៌មានមួយថា "ឥឡូវនេះយើងមានបទពិសោធន៍ជាង ២០ ខែទាក់ទងនឹងកូវីដ១៩បំប្លែងខ្លួន និងរលកផ្សេងៗ"។

កាលពីថ្ងៃចន្ទ ប្រទេសជប៉ុនបានក្លាយជាប្រទេសចុងក្រោយគេដែលបានដាក់ការរឹតបន្តឹងព្រំដែនតឹងតែងឡើងវិញ ដោយហាមជនបរទេសទាំងអស់មិនឱ្យចូលចាប់ពីថ្ងៃទី៣០ ខែវិច្ឆិកា។ចក្រភពអង់គ្លេស សហភាពអឺរ៉ុប និងសហរដ្ឋអាមេរិក ស្ថិតក្នុងចំណោមអ្នកដែលបានដាក់បម្រាមការធ្វើដំណើរមុនគេមកលើអាហ្វ្រិកខាងត្បូង និងរដ្ឋក្នុងតំបន់ផ្សេងទៀត។អគ្គលេខាធិការអង្គការសហប្រជាជាតិលោក អានថូនី គូថេរ៉េស បាននិយាយថាលោកមាន "ការព្រួយបារម្ភយ៉ាងខ្លាំង" អំពីភាពឯកោនៃទ្វីបអាហ្វ្រិកភាគខាងត្បូង ដោយបន្ថែមថា "ប្រជាជននៃទ្វីបអាហ្រ្វិកមិនអាចត្រូវបានស្តីបន្ទោសចំពោះកម្រិតទាបនៃវ៉ាក់សាំងដែលមាននៅក្នុងទ្វីបអាហ្រ្វិកទេ"៕