ក្រុមយុវជននារីអង់គ្លេសនឹងចូលលេងលីគទី៣

សហព័ន្ធបាល់ទាត់អង់គ្លេស FA បានអនុម័តផែនការថ្មី ដោយអនុញ្ញាតឱ្យក្រុមយុវជននារីចំនួន ៤ ពីលីគកំពូល WSL ចុះទៅប្រកួតក្នុងលីគកម្រិតទីបី ចាប់ពីប្រកួតរដូវកាល ២០២៧-២៨ តទៅ។ ការផ្លាស់ប្តូរនេះធ្វើឡើងដើម្បីជួយជំរុញឲ្យកីឡាការិនីវ័យក្មេងបានចូលលេងលើទីលានប្រកួតពិតប្រាកដឱ្យបានច្រើនជាងមុន។

ផ្អែកលើទិន្នន័យរបស់ FA កីឡាការិនីវ័យក្មេងនៅអង់គ្លេសទទួលបាននាទីលេងលើទីលានតិចជាងកីឡាការិនីនៅលីគធំៗផ្សេងទៀតក្នុងអឺរ៉ុប។ ក្រៅពីដាក់ក្រុមយុវជនឱ្យចូលលេង លីគកម្រិតទីបី និងទីបួនក៏ជួយសម្រួលដល់ការខ្ចីជើងកីឡាការិនី ព្រមទាំងទទួលបានថវិកាឧបត្ថម្ភពីរដ្ឋបាលកណ្តាលជាលើកដំបូងផងដែរ។

ទោះជាយ៉ាងណា ក្រុមយុវជនទាំង ៤ នេះគ្មានសិទ្ធិឡើងថ្នាក់ទៅលីគលើឡើយ ដោយពីរក្រុមត្រូវលេងនៅតំបន់ខាងជើង និងពីរក្រុមទៀតនៅតំបន់ខាងត្បូង។ លោកស្រី Sue Day នាយកផ្នែកបាល់ទាត់នារីរបស់ FA បានបញ្ជាក់ថា នេះជាជំហានចាំបាច់មួយដើម្បីពង្រីកឱកាសដល់កីឡាការិនីវ័យក្មេងកសាងសមត្ថភាពក្នុងកម្រិតអាជីព។