របាយការណ៍បង្ហាញពីឧក្រិដ្ឋកម្មផ្លូវភេទទៅលើកុមារប្រព្រឹត្តដោយសង្ឃកាតូលិកបារាំង
គណៈកម្មការឯករាជ្យមួយរបស់បារាំងទើបបានបង្ហាញរបាយការណ៍ដ៏គួររន្ធត់មួយ កាលពីថ្ងៃអង្គារទី ៥តុលា។ របាយការណ៍ដែលជាលទ្ធផលនៃការស៊ើបអង្កេតរយៈពេល ជាង ២ឆ្នាំ បានបង្ហាញថា មានកុមារជាង៣ម៉ឺននាក់ ដែលរងគ្រោះដោយឧក្រិដ្ឋកម្មផ្លូវភេទលើកុមារ ដែលនៅក្នុងនោះ មាន ជាង ២ម៉ឺននាក់រងគ្រោះដោយផ្ទាល់ដោយ ការរំលោភបំពានផ្លូវភេទ ប្រព្រឹត្តឡើងដោយលោកសង្ឃកាតូលិកបារាំង។ តាំងពីបុរី វ៉ាទីកង់ ប្រមុខសង្ឃកាតូលិក ហ្វ្រង់ស័របានសំដែងការទុក្ខព្រួយ ដ៏ធំធេង នៅចំពោះមុខការពិត ដ៏គួរឲ្យព្រឺខ្លាចមួយនេះ។
តាមអ្នកនាំពាក្យរបស់បុរីវ៉ាទីកង់ នៅក្រោយរបាយការណ៍ ចេញផ្សាយពីឧក្រិដ្ឋកម្មផ្លូវភេទលើកុមារ សម្តេចប៉ាប ហ្វ្រង់ស័រ គ្មានអ្វី ក្រៅតែពីគិត នឹកដល់ដំបូងគេដល់ជនរងគ្រោះ ដល់របួសស្នាមរបស់ពួកគេ និងការដឹងគុណ ពួកគេដែលមានសេចក្តីក្លាហានដើម្បីបកអាក្រាត រឿងអាស្រូវមួយនេះ។របាយការណ៍កម្រាស ៤៨៥ទំព័រ (ភ្ជាប់ជាមួយ ឧបសម្ព័ន្ធ ២ពាន់ទំព័រ )របស់ គណៈកម្មការឯករាជ្យស្តីពីការរំលោភបំពានលើកុមារ នៅវិហារកាតូលិក បានបង្ហាញថា ចាប់តាំងពីឆ្នាំ ១៩៥០ ដល់ឆ្នាំ ២០២០ មានកុមារ ជាង ២១៦ ០០០នាក់ដែលរងគ្រោះដោយសារការរំលោភបំពានផ្លូវភេទ ពីសំណាក់ លោកសង្ឃកាតូលិក នៅក្នុងប្រទេសបារាំង។បើសិនគេរាប់បញ្ចូលទាំងការរំលោភបំពានពីសំណាក់គ្រូបង្រៀន មន្រ្តីត្រួតពិនិត្យ និងប្រធានក្រុមក្មេងscout ដែលធ្វើការក្នុងស្ថាប័នវិហារកាតូលិក ទៀតនោះ គេរកឃើញមានកុមារសរុបជាង ៣សែនដែលធ្លាក់ខ្លួនរងគ្រោះ ដោយសារឧក្រិដ្ឋកម្មផ្លូវភេទលើកុមារ។ នៅក្នុងរយៈពេលស៊ើបអង្កេត ២ឆ្នាំ ដោយផ្តោតសំខាន់លើឯកសារចាស់ៗ របស់វិហារកាតូលិក បារាំង និងបានសាកសួរសាក្សី ជាង២៥០នាក់ គេវាយតម្លៃថា មានសង្ឃកាតូលិក ពី ២៩០០ ទៅ ៣២០០នាក់ ដែលបានរំលោភផ្លូវភេទលើកុមារ ចាប់ពីឆ្នាំ ១៩៥០ ដល់ឆ្នាំ ២០២០។ ក្មេងប្រុស តំណាង ឲ្យ៨០%នៃជនរងគ្រោះដោយសារឧក្រិដ្ឋកម្មផ្លូវភេទលើកុមារ។តាមលោក Jean Marc Sauvé ប្រធានគណៈកម្មការឯករាជ្យដែលជាអ្នកដឹកនាំការស៊ើបអង្កេតលើការរំលោភបំពានលើកុមារ គេរកឃើញមានការធ្វេសប្រហែស ចន្លោះប្រហោង និងស្ងាត់បិទមាត់ ជាលក្ខណៈ ប្រព័ន្ធ ក្នុងស្ថាប័នសាសនាមួយនេះ។ វិហារកាតូលិកមិនចេះឃើញ មិនចេះស្តាប់ មិនចេះចាប់សញ្ញាខ្សោយ និងមិនបានចាត់វិធានការម៉ត់ចត់។ រហូតមកដល់ឆ្នាំ ២០០០ វិហារកាតូលិកនៅតែបិទភ្នែក បិទត្រចៀក មិនទទួលស្តាប់សាក្ខីកម្មរបស់ជនរងគ្រោះ។ ផ្ទុយទៅវិញ វិហារកាតូលិកនៅបារាំង បាននិយាយបែបទម្លាក់កំហុសលើជនរងគ្រោះថា ជាអ្នកចូលរួមតិច ឬច្រើន ក្នុងទង្វើដែលកើតឡើងលើពួកគេទៅវិញ។សម្រាប់ជនរងគ្រោះម្នាក់ ដែលបាននិយាយប្រាប់ទីភ្នាក់ងារព័ត៌មានបារាំង AFP វាជាប្រវត្តិសាស្រ្តព្រោះថា គេមិនអាចនិយាយទៀតទេថា គេសំអុយឈ្មោះ វិហារកាតូលិក និងថា គេត្រូវបិទទំព័រចាស់ ចាប់ផ្តើមជីវិតថ្មី។នៅពេលទទួលរបាយការណ៍ដោយផ្ទាល់ដៃពីគណៈកម្មការស៊ើបអង្កេតលើការរំលោភបំពានប្រព្រឹត្តដោយសង្ឃកាតូលិក ប្រធានសន្និសីទសង្ឃនាយករបស់បារាំង លោក Eric Moulin Beaufort បានសំដែងការខ្មាស់អៀន និងក្តីរន្ធត់។ លោកបាននិយាយសុំទោសដល់ជនរងគ្រោះទាំងជាង៣សែននាក់ ដែលរងគ្រោះដោយសារការរំលោភបំពានផ្លូវភេទក្នុងទីកន្លែងសាសនាកាតូលិក។ប្រធានគណៈកម្មការស៊ើបអង្កេត ដែលជាអតីតអនុប្រធានក្រុមប្រឹក្សារដ្ឋ លោក Jean Marc Sauvé បានអំពាវនាវ ណែនាំឲ្យគេបង់ថ្លៃសងជំងឺចិត្ត ដល់ជនរងគ្រោះដោយសារអំពើហិង្សាផ្លូវភេទ ប្រព្រឹត្តដោយសង្ឃកាតូលិក តាមរយៈ ការប្រើប្រាក់ ដែលរឹបអូសយកបានមកពីទ្រព្យសម្បត្តិរបស់ជនល្មើស និងប្រាក់របស់វិហារកាតូលិកបារាំង៕
1298.223 SRY