ឡាវនិមន្តព្រះសង្ឃប្រោសពរជ័យដល់ខ្សែរថភ្លើងល្បឿនលឿនថ្មីរបស់ខ្លួន

ឡាវបានរៀបចំពិធីតាមបែបព្រះពុទ្ធសាសកាលពីថ្ងៃព្រហស្បតិ៍ទី២ខែធ្នូដើម្បីប្រទានពរជ័យដល់ខ្សែរថភ្លើងល្បឿនលឿនថ្មីរបស់ខ្លួនដែលមានតម្លៃ ៦ ពាន់លានដុល្លារ ដែលជាគំនិតផ្តួចផ្តើមដឹកនាំដោយចិន ដែលបង្ហាញពីការលោតផ្លោះដ៏ធំបំផុតមួយឆ្ពោះទៅរកទំនើបកម្មដោយប្រទេសអភិវឌ្ឍន៍តិចតួចបំផុតមួយនៅអាស៊ី។ ផ្លូវដែកនេះតភ្ជាប់ពីទីក្រុងគុនមីងភាគអាគ្នេយ៍ប្រទេសចិនទៅកាន់រដ្ឋធានីវៀងចន្ទន៍ប្រទេសឡាវ ដែលលាតសន្ធឹងជាង ១.០០០ គីឡូម៉ែត្រ និងឆ្លងកាត់ជួរភ្នំនិងប្រព័ន្ធទឹកជាច្រើន។ ទីភ្នាក់ងារសារព័ត៌មានរដ្ឋឡាវ KPL បាននិយាយកាលពីថ្ងៃព្រហស្បតិ៍ថា គម្រោងនេះគឺជាផ្នែកមួយនៃយុទ្ធសាស្ត្ររបស់រដ្ឋាភិបាលក្នុងការប្រែក្លាយប្រទេសឡាវ "ពីប្រទេសដែលគ្មានព្រំដែនទឹកទៅជាប្រទេសដែលមានបណ្តាញដីគោគតភ្ជាប់គ្នា"។ ខ្សែរថភ្លើងដែលចិនសង្ឃឹមថានៅទីបំផុតនឹងពង្រីកដល់ប្រទេសសិង្ហបុរី គឺជាផ្នែកមួយនៃគំនិតផ្តួចផ្តើមអំពីក្រវ៉ាត់និងផ្លូវ (BRI) ពោរពេញដោយមហិច្ឆតារបស់ចិន។នៅថ្ងៃបុណ្យជាតិឡាវកាលពីថ្ងៃព្រហស្បតិ៍ ព្រះសង្ឃបានសូត្រមន្តនៅពិធីសម្ពោធផ្លូវរថភ្លើងថ្មីនេះ ហើយបានប្រសិទ្ធិពរជ័យដល់រថភ្លើងជាមួយនឹងទឹកមន្តនិងយ័ន្តសំណាងមុនការបើកដំណើរការជាផ្លូវការនៅថ្ងៃសុក្រនេះ។ជាមួយនឹងប្រជាជនចំនួន ៧ លាននាក់ និងផលិតផលក្នុងស្រុកសរុបត្រឹមតែ ១៨ ពាន់លានដុល្លារក្នុងឆ្នាំ ២០១៩ ឡាវកុម្មុយនីស្តគឺជាប្រទេសក្រីក្របំផុតមួយរបស់អាស៊ី។ពួកសេដ្ឋកិច្ចវិទូបានព្រមានថា គម្រោងផ្លូវដែកនេះអាចធ្វើឱ្យស្មុគស្មាញដល់បញ្ហាប្រឈមរបស់ខ្លួនក្នុងការសងបំណុលក្រៅប្រទេស ដែលភាគច្រើនសងទៅចិន។ប្រទេសចិនកាន់កាប់ភាគហ៊ុន ៧០ ភាគរយនៅក្នុងក្រុមហ៊ុនផ្លូវដែកបណ្តាក់ទុនរួមគ្នាដែលបានបង្កើតឡើងក្នុងឆ្នាំ ២០១៥ ។ការវិនិយោគសរុបគឺមានចំនួន ៥០,៥៥ ពាន់លានយ័ន (៧,៩៣ ពាន់លានដុល្លារ) នេះបើយោងតាមអត្ថបទមួយរបស់វេបសាយ Belt and Road Portal របស់ប្រទេសចិនកាលពីដើមឆ្នាំនេះ។ ទីភ្នាក់ងារសារព័ត៌មាន KPL បានដាក់ស្លាកតម្លៃត្រឹម ៥,៩៨ ពាន់លានដុល្លារ។សម្រាប់​លោក ណុកផូន ផូតសាវ៉ាង អាយុ ៣៥ ឆ្នាំ ដែល​ធ្វើការ​ក្នុង​វិស័យ​សណ្ឋាគារ គម្រោង​ផ្លូវដែក​នេះ​នឹង​មាន​ប្រយោជន៍​សម្រាប់​ប្រទេស​ឡាវ។លោកផូតសាវ៉ាងបាននិយាយថា "ខ្ញុំជឿថាផ្លូវដែកនេះនឹងនាំមកនូវឱកាសជាច្រើន ហើយខ្ញុំកំពុងទន្ទឹងរង់ចាំកំណើនសេដ្ឋកិច្ច"។"វា​ក៏​ជួយ​សម្រួល​ដល់​ការ​ធ្វើ​ដំណើរ​រវាង​ទីក្រុង ហើយ​នឹង​នាំ​ក្រុម​គ្រួសារ​កាន់​តែខិតជិតគ្នា"៕