៦ខែ ឆ្នាំ២០២១ កម្ពុជាទទួលបានការវិនិយោគផ្ទាល់ពីបរទេសជាង៣៩ប៊ីលានដុល្លារ ដោយផ្ដោតលើវិស័យកសិកម្ម កម្មន្តសាល ហិរញ្ញវត្ថុ សណ្ឋាគារ និងអចលនទ្រព្យជាដើម។ ទំហំនៃការវិនិយោគ គឺកើនឡើង៩,៦ភាគរយ បើធៀបនឹងពេលដូចគ្នានឹងឆ្នាំមុន។
ធានាគារជាតិនៃកម្ពុជា ចេញផ្សាយលើទំព័ហ្វេសប៊ុករបស់ខ្លួនថា ទំហំវិនិយោគបរទេស៣៩ប៊ីលានដុល្លារ គឺមានប្រភពពីប្រទេសចិន កូរ៉េខាងត្បូង វៀតណាម សិង្ហបុរី ជប៉ុន ម៉ាឡេស៊ី ថៃ អង់គ្លេស និងកាណាដា។ លំហូរវិនិយោគនេះគ្របដណ្តប់លើវិស័យកសិកម្ម កម្មន្តសាល ហិរញ្ញវត្ថុ សណ្ឋាគារនិងរមណីយដ្ឋាន សំណង់ វារីអគ្គិសនី និងអចលនទ្រព្យ ជាដើម។ សម្រាប់ផ្នែកហិរញ្ញវត្ថុមានការវិនិយោគប្រមាណ២១ភាគរយ កម្មន្តសាល២០ភាគរយ អចលនទ្រព្យ១២ភាគរយ សណ្ដាគារ១១ភាគរយ និងកសិកម្ម១០ភាគរយ។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុរូបនេះ បានបញ្ជាក់ថា ទោះបីជាកម្ពុជាកំពុងប្រឈមនឹងជំងឺកូវីដ-១៩ និងបន្តសម្របខ្លួនទៅនឹងប្រក្រតីភាពថ្មីក្តី ក៏ប៉ុន្តែវិស័យអចលនទ្រព្យនេះ គឺនៅមានសក្កានុពលក្នុងការវិនិយោគ។ លោក អូន ព័ន្ធមុនីរ័ត្នថា៖«អត្រានេះ គឺបានដោយសារការកើនឡើងសន្សឹមៗនៃលំហូរទុនវិនិយោគពីបរទេស ខណៈការវិនិយោគនិងតម្រូវការស្រុកលើវិស័យអចលនវត្ថុដែលមានតម្លៃទាបនិងមធ្យម នឹងបន្តរក្សាកំណើនល្អប្រសើរ»។
306.271 SRY