ប្រមុខរាជរដ្ឋាភិបាលកម្ពុជាបានស្នើឱ្យដកបម្រាមដែលក្រសួងសុខាភិបាលបានប្រកាសហាមអ្នកដំណើរដែលមកពីប្រទេសចំនួន ១០ នៅទ្វីបអាហ្វ្រិក ដើម្បីការពារនូវវីរុសកូវីដ ១៩ បំប្លែងថ្មី ឈ្មោះអូមីក្រុង (Omicron) ប៉ុន្តែត្រូវធ្វើតេស្តជាមួយនឹងម៉ាស៊ីនធំ PCR សម្រាប់អ្នកដំណើរមកពីប្រទេសទាំងនោះវិញ និងបន្តពង្រឹងនូវវិធានការសុខាភិបាលសម្រាប់ប្រជាពលរដ្ឋក្នុងប្រទេស។
លោកនាយករដ្ឋមន្ត្រី ហ៊ុន សែន បានលើកឡើងនៅក្នុងពិធីសម្ពោធដាក់ឱ្យប្រើប្រាស់នូវសមិទ្ធផលជាច្រើនក្នុងខេត្តព្រះសីហនុនៅព្រឹកថ្ងៃទី ២ ខែ ធ្នូ ឆ្នាំ ២០២១ ថា ទោះបីជាមានវីរុសបំប្លែងថ្មីឈ្មោះអូមីក្រុង នេះក៏ដោយ តែសុំប្រជាពលរដ្ឋកុំស្លន់ស្លោហួសហេតុនិងកុំភ័យពេករហូតដល់បាត់ម្ចាស់ការ។
លោកបានថ្លែងថា៖ «ខ្ញុំគិតថា ឯកឧត្តម ម៉ម ប៊ុនហេង គួរពិភាក្សាគ្នា។ ខ្ញុំហាក់ដូចជាបានយល់ស្របជាមួយនឹងលោក អង់តូនីញ៉ូហ្គូតេស អគ្គលេខាធិការអង្គការសហប្រជាជាតិ ដែលលោកថា នៅពេលដែលគេកាត់ផ្តាច់បិទការហាមចូលនេះធ្វើឱ្យប្រទេសនៃតំបន់អាហ្វ្រិកខាងត្បូងមានភាពឯកោ។ អគ្គលេខាធិការអង្គការសហប្រជាជាតិបង្ហាញនូវការសោកស្តាយ ហើយគាត់ស្នើនូវវិធានការជំនួសវិញតាមរយៈការបង្កើនការធ្វើតេស្ត»។
លោកនាយករដ្ឋមន្ត្រី ហ៊ុន សែន ថ្លែងថា ប្រទេសកម្ពុជាមិនមានជើងហោះហើរត្រង់ពីអាហ្វ្រិកមកទេ ដែលវាមិនមានការចាំបាច់ដើម្បីកំណត់ហាមប្រាមនោះទេ ក៏ប៉ុន្តែអាចនឹងមានតម្រូវការឱ្យអ្នកដំណើរដែលមកពីប្រទេសទាំងនោះគប្បីបង្កើនការធ្វើតេស្ត ទោះបីគាត់មានវ៉ាក់សាំងហើយក៏ដោយ ប៉ុន្តែអាចសុំអធ្យាស្រ័យពីគាត់ធ្វើតេស្ត PCR វិញ ជាជាងការដាក់បារ៉ាស់ (ការហាមឃាត់)។
242.746 SRY