ស្ដ្រី

៙. ភេទស្ត្រី   មានអ្វីអន់   ទន់តែកាយ
ចិត្តមិនណាយ  ម្ដាយថែបុត្រ  ពុទ្ធមាតា  
ទ្រង់ធម្មា  ជា អគ្គ-  សាវិកា  
វិសាខា   មហាស្ត្រី  ល្បីណាស់ហើយ ។      
• ព្រះធម្មចក្ក  ជះរស្មី  ផែនដីធម៌
មិនឱ្យល្អ   តែបុរស  ប៉ុណ្ណោះឡើយ
ព្រះរស្មី  រតនត្រៃ  ស្ត្រីអើយ 
ភក្ត្រាត្រើយ  ស្ងប់ទុក្ខហើយ  មិនវិលវិញ។ 
• នៅត្រង់ថា  ដួងនេត្រា   អ្នកណាភ្លឺ  
សោតាឮ   គឺសទ្ធា   លាបញ្ចេញ  
ទទួលយក   សច្ចរស   អស់ម្នោម្នេញ 
ផលពេញលេញ  យាត្រាចេញ  គ្រប់វេលា។
• កុំអន់ចិត្ត   ដ្បិតជាស្រី   ទាស់អ្វីរូប 
ឈូកបើកនោប  សីលក្រអូប  ស្រូបធម្មា
មិនបានគ្រង   ត្រៃចីវរ   ក៏បព្វជ្ជា 
ដោយហទយា  សូមបូជា  ព្រះទសពល។